Vengê teyareyan nêweşî virazeno

 Goreyî cigêrayoxan leyminîya aw, herr û hewa ra dima leyminîyek muhîm zî leyminîya vengî ya. Şaristananê gird û cayê ke qadêy kêfweşî tede esto de, wexto ke desîbeyê vengî zaf berz bibo semeda înan ceza yeno birnayîş. La teyareyê şer ke her roj Amedî ra pêsero warzênîy û no hawa şarê Amedî bi vengê xo yê berz eciz kenîy sero ti ceza nîno birnayîş. Goreyê cigêrayoxan leyminîya vengê F-16yan nêweşîya tansîyonî û goş de olandayîş virazeno û rayna banderbîyayîşê vengê berzî reyde qalîkerdiş zî encamê no yo. No zî mîyanê komelî de bena sebebê têmîyankewtişî.

Doman nêşkenî dersa xo bikerî

Domanê şaristanî ke her roj vengê teyaranê F-16 eşnawenîy, mîyanê tersî de manenîy. Domanê ke no şerê ke bi serran o ke heremî de domyeno mîyan de gird bîy, vengê teyaran sero derûnîya înan xera beno û nêşkenîy dersêy xo bixebetyî. na semed ra zî mektebî de ser nêkewenîy.

Endamê Komîsyona Ekolojî yê KCDî Sergen Sucu dîyar kerd ke raverêyeya çarekerdişî de zî teyareyê şerî nêvindertîy û dewlet bi firnayîşê teyaran peyamê, “bewnênê, ez ser sereyê şima de ya, ger ke ez biwaza ez eşkena heme çî bikera” dana ma.